《 睇你几时死！ 》痴L线电影
平时睇戏中途听到有人讲嘢，我一定会好想佢收声。今次睇《 睇你几时死！ 》嘅时候，听到后面观众好几次发自内心地嗌出：「痴L线！」，但我并冇怪佢，仲好认同佢。因为呢部电影的确好「痴L线」，画面血腥、角色荒诞，故事又充满黑色幽默，合埋一齐睇真係非常过瘾！
剧情就咁听落，都已经够怪诞：一个古惑仔受女友所託，单人匹马走上门谂住杀死女友爸爸，点知女友爸爸并唔简单。一件「普通」嘅杀人任务，慢慢变成一条锁匙，逐渐打开每个角色嘅阴暗面，揭穿大家嘅秘密……
电影一开波好快就「嚟料」，作为一个唔係成日睇血腥电影嘅人，我直程有一刻后悔入场。事关古惑仔同人哋老豆除咗用鎚仔做武器，仲动用埋屋企嘅家俬电器，好似柜同电视机，后来仲用埋电钻同枪（作为战斗民族，屋企有枪係非常之合理嘅）。两人毫不留情出力互殴，睇到我一边好肉紧，一边又担心自己到底顶唔顶得顺……不过，虽然画面係暴力血腥，但气氛同对白又搞笑多过恐怖，令我谂起星爷套《回魂夜》。
本来以爲成套戏就係睇人打交，但我发现，虽然《 睇你几时死！ 》以血腥做卖点，但佢冇净係专注一堆变态爆血嘅画面，搞到忽略咗剧本。相反，故事其实带到畀我惊喜。一路睇都估唔到剧情点样发展，亦都估唔到结局係点。平时睇呢类「奇幻电影」最怕烂尾，但佢冇！成套电影畀我嘅感觉都好完整。
完场嗰阵，我第一个谂法係：「唔知套戏用咗几多公升血浆呢？」虽然只係睇人打，但我都有种畀人打咗一身嘅感觉，证明真係睇到好紧张。如果要形容呢套戏，我觉得係《非常外父》x《恐惧斗室》x《回魂夜》。锺意睇重口味电影嘅你，一定要入场睇！
文：SC
请先 ！