《 不死军团 》想几时死都唔到你话事！
首先我觉得《 不死军团 》中文戏名改得不够贴题，佢哋唔係一队「军队」或者「军团」，鎗火炮弹亦都唔係呢套戏嘅重点，所以唔好一心想睇啲震撼嘅大规模激战场面而走去睇。
佢哋係得几丁友嘅秘密小队，唔知点解每隔一段时间（数以世纪去计），呢个世界就会诞生一个点整佢都唔会死嘅人，然后佢哋会聚集埋一齐，由佢哋之中最老嘅一位 － Andy（Charlize Theron）带领底下去进行一啲不为人知嘅任务。呢个咁惊世嘅天赋，你估俾人发现咗会点？无错，总有啲陷＿铲想拎嚟做坏事，想将佢哋一网打尽，进行会令佢哋生不如死嘅研究。喺呢段非常时期，「新生儿」Nile 诞生……
电影时长两小时，节奏略慢，但剧情尚算丰富。虽然剧情唔难估到，但我会想睇角色之间关係、性情上有咩转变，所以一路睇落去都无pause嘅冲动。动作场面离不开，但期望值大家可以降低返少少，反正佢嘅定位睇落都唔係完完全全嘅动作娱乐大片，即係同Netflix《鬼影特攻：以暴制暴》性质唔同。
观众由一个新生儿嘅角度去了解呢班人，佢哋会话你知当初经历过嘅嘢，大家嘅简单背景之类，观众亦都跟住呢位新生儿慢慢成长，对「 不死军团 」嘅观感都会慢慢转变。呢班「死老嘢」唔会企係高地去教训呢个新仔，反而真係当佢好似屋企人咁样，性格非常讨人喜欢，呢样嘢唔知点解睇到我有少少感动，感动角色嘅设定唔係啲传统老土嘢。
死亡唔係你同我或者戏入面嘅角色可以主宰到，最后发现原来咩生命都会有完结嘅一日，个脑会谂紧啲咩？会反而努力咁去求生？定话终于都等到呢一日可以了结一切呢？班角色每一个脑入面都应该有唔同嘅答案。
最后尾舖咗条伏线，而呢条伏线正正就关于我睇完套戏好想知嘅嘢！所以如果佢出第二集我都一定会追。今集大佬Andy同新仔Nile嘅篇幅比较多，希望团队其他三位成员下次可以重啲戏份，同埋Andy要保重，希望下集都有佢。
文：sowhatmovie
请先 ！